Essemmess

Staksteinum hafa borist fjöldamörg essemmess vegna skrifa um þá blindu heift sem ríkir hjá sumum gagnvart sumum. Því miður kunna Staksteinar ekki að essemmessa til baka þannig að ef einhver af þessum foryztumönnum Sjálfstæðisflokksins lumar á leiðbeiningum um hvernig það er gert, þá mega þær fylgja með í næsta essemmessi.

Þriðja sætið er sigur fyrir Morgunblaðið

Fréttaflækjan Eyjan sem starfar á netinu án þess að eigendur liggi en er undir stjórn spunameistara fyrrum borgarfulltrúa Framsóknarflokksins birtir frétt í dag þar sem segir:

"Morgunblaðið er orðið þriðja útbreiddasta dagblað landsins, samkvæmt nýrri könnun Capacent á dagblaðalestri. Fréttablaðið heldur enn öruggri forystu á dagblaðamarkaði en 24 Stundir hafa skotið systurblaði sínu, Morgunblaðinu, ref fyrir rass."

Hvers konar fréttaflutningur er þetta? Hér er ráðist að Morgunblaðinu af blindri heift og einskis svifist til að koma höggi á blaðið. Hér er höggvið í sama knérunn og gert hefur verið að undanförnu. Fyrirtækið Capacent (hvað þýðir það nafn eiginlega) er á villigötum, því það er ekki markmið Morgunblaðsins að vera útbreitt. Að gefa slíkt í skyn er ógeðfellt.  Og að tala um ref fyrir rass. Þvílk heift!

 


Sómi hvað?

Bent hefur verið á að í landinu er gefið út blað sem heitir víst Fréttablaðið en er í eigu Baugs, sem sagt: Léttvægt dótturfélag auðhrings svo gripið sé til orðalags úr hinni helgu bók. Í þetta svokallaða blað skrifaði rithöfundur sem kallar sig Guðmund Andra Thorsson áróðursgrein í dag sem litast af blindri heift hans í garð Morgunblaðsins, Sjálfstæðisflokksins, Davíðs Oddssonar og Björns Bjarnasonar. Þar segir:

„Enn hefur Morgunblaðið ekki beðið Dag B. Eggertsson afsökunar á leiðaraskrifum sínum frá laugardeginum 26. janúar. Þar stóð að það væri honum - lækninum - til skammar að Ólafur F. Magnússon hefði lagt fram
læknisvottorð þegar hann sneri aftur til starfa í borgarstjórn. Samt er blaðið hér uppvíst að því að veitast að Degi fyrir rangar sakir....

En Morgunblaðið hefur sem sé enn ekki séð sóma sinn í að biðja Dag B. Eggertsson afsökunar á því að birta meiðandi rangfærslur um hann í forystugrein. Það skiptir hann eflaust litlu máli en kann að varða sjálfsmynd blaðsins og margra ágætra blaðamanna sem þar starfa..“

Hvað á svona málflutningur að þýða? Hvers konar kveif er Guðmundur Andri/Samfylkingin/Spaugstofan/Sigurður Líndal? Að gagnrýna Morgunblaðið fyrir að segja hlutina eins og blaðið vildii að þeir væru? Eru menn að opna blaðið í fyrsta skipti? Hafa menn ekki lesið minningargreinarnar þar sem aldrei er sagður löstur á nokkrum manni? Jafnvel drykkfelldum ónytjungum? Og þetta kemur frá skáldsagnahöfundi! Manni sem hefur sitt lifibrauð af því að ljúga einhverju fallegu að fólki.

Að gagnrýna blaðið fyrir að reyna að móta söguna eftir á er með eindæmum. Hvers konar fólk er það sem ræðst með svo ógeðfelldum hætti að blaðinu?


Málefnasamningur, ekki málefni

24 stundir birta í dag frétt um að málefnasamningur Sjálfstæðizflokks og F-lista sé bakaður í hlutföllunum 70%F og 30%D. Talað er um að Sjálfstæðisflokkurinn sé orðinn hækja fyrir F-listann. Slíkur fréttaflutningur er ógeðfelldur. Í staðinn hefði átt að gera frétt um það hversu íbúum borgarinnar er létt yfir því að málefnasamningur sé yfir höfuð til. Þótt hann hafði verið gerður á innan við klukkutíma þá er hér á ferðinni slíkt tímamótaplagg að undrum sækir. 24 stundir skilja greinilega ekki kjarna málsins. Aðalatriðið er að plaggið sé til, aukaatriði hvað stendur í því.

Sá hugsunarháttur hefur gefist Sjálfstæðisflokknum vel hingað til og það eiga 24 stundir að vita. Fréttaflutningur um innihald er ekki aðeins óviðeigandi heldur ógeðfelldur. Allir vita að Reykjavík hefur jafnan vegnað best þegar Sjálfstæðisflokknum vegnar best. Blómaskeið Reykjavíkur í tíð R-listans er andstyggileg blekking.


Vindar sjást ekki

Það er greinilegt að vinztri mönnum svíður sú málefnalega gagnrýni sem Staksteinar hafa haldið á lofti. Til dæmis segir Sigmundur Ernir: „Mogginn er annars sér kapituli í pólitíkinni þessa dagana. Ofsahatur hans á Samfylkingunni er dæmalaust - og á eiginlega ekkert skylt við blaðamennsku lengur.“ Hvers konar málflutningur er þetta? Og hvers konar nafn er Ernir eiginlega? 

Fyrrum blaðamaður Morgunblaðsins, Davíð Logi Sigurðsson, heggur í sama hnérunn:

„Ég sé að í dag blása vindar um minn gamla vinnustað heima á Íslandi. Leiðaraskrif ritstjórans eru þar skýringin. Ég segi það eitt, að það er leiðinlegt að blaðið og það góða fólk sem þar starfar skuli þurfa að gjalda fyrir þann einarða ásetning ritstjórans að bera sigur úr býtum í því stríði sem hann telur sig verða að heyja um þessar mundir í pólitíkinni - með mismálefnalegum hætti. Persónulega hef ég miklar efasemdir um að sá stríðsrekstur þjóni hagsmunum Morgunblaðsins. En ef ég þekki mitt heimafólk rétt telur ritstjórinn að aðeins hann geti skilgreint þá hagsmuni, aðeins hann þekki þá til hlítar.“

Hvers konar þvættingur er þetta? Hvernig getur maðurinn þóst zjá þá vinda sem blása um hans gamla vinnustað? Vindar sjást ekki. Og síst allra frá Beirút. Það veit hver heilvita maður. Sér er nú hver vindgangurinn. Svona málflutningur er ógeðfelldur.

 


Ómakleg gagnrýni

Málpípur fráfarandi meirihluta í borgarstjórn hafa dylgjað um flumbrugang og flausturzleg vinnubrögð við myndun nýs og endurbætts meirihluta í borgarstjórn. Hvers konar málflutningur er þetta?

Menn hafa gagnrýnt það að Margrét Sverrizdóttir hafi ekki verið höfð með í ráðum. Til hvers? Hafði ekki sérstakur trúnaðarlæknir Sjálfstæðisflokksins vottað að tilvonandi borgarstjóri væri við fulla heilsu? Það hefur komið fram í fjölmiðlum. Til hvers að eltast við varazkeifuna þegar sjálfur gæðingurinn er kominn á básinn?

Hverjir gagnrýna húsakaup við Laugaveg? Voru það ekki þeir sömu og gagnrýndu sölu húsa borgarinnar við Fríkirkjuveg? Var það flauztur? Flumbrugangur?

Taglhnýtingar Samfylkingarinnar dirfazt jafnvel að gagnrýna skipun Krístínar Edwald sem formanns barnaverndarnefndar. Og í hinu orðinu krefjast þeir aukins hlutar kvenna í stjórnunarztöðum. Kristín, eins og aðrar konur, hafa áhuga á börnum og því töldu menn sjálfsagt að hún tæki þetta embætti. Ekki þótti þörf á að ræða þetta sérstaklega við hana. En hverjir kalla þetta flaustursleg vinnubrögð? Eru það ekki þeir sömu og gagnrýndu nýlega skipun héraðzdómara á ógeðfelldan hátt og hafa þar með dæmt sig úr leik í umræðunni?


Bolabrögð

Nú hefur Sjálfstæðisflokkurinn komizt til valda í Reykjavík eins og maklegt er. Til þess var borgin byggð. Vont er þegar vinztrimenn ná þar völdum og troða sínum stefnumálum upp á borgarbúa.

Vinztrimenn eru ekki til margra hluta nytsamlegir. Þó er gaman að skrifa um þetta fólk.

Til dæmis Össur. Og Dag B. Eggertsson. Fátt er meira gaman en að skrifa um þessa menn. Nema ef vera skyldi Ingibjörg Sólrún. Þetta fólk.

Nú hefur Sjálfstæðisflokkurinn komizt til valda í Reykjvík eins og maklegt er. Flokkurinn hefur nú sterka stöðu undir forystu borgarstjóra, Ólafs F. Magnússonar. Allt tal um að meirihlutinn sé veikur er ógeðfellt og það fólk sem er reitt eftir einkennilegan aðdraganda stofnunar meirihlutans er líka ógeðfellt. Nýi minnihlutinn er jafnframt ógeðfelldur. Einnig er Pétur Kr. Hafstein ógeðfelldur, sem og Sigurður Líndal. Þá er Dómarafélag Íslands ógeðfellt.

Hvað heldur þetta fólk að það sé?


Innskráning

Ath. Vinsamlegast kveikið á Javascript til að hefja innskráningu.

Hafðu samband